चिनियाँ राष्ट्रपति सी पहिलो पटक तिब्बतमा


काठमाडौँ — चिनियाँ राष्ट्रपति सी चिनफिङले स्वशासित क्षेत्र तिब्बत भ्रमण गरेका छन् । राष्ट्रपति भएपछि सी पहिलो पटक तिब्बत पुगेका हुन् । यसअघि सन् २०११ मा उपराष्ट्रपतिका रुपमा सीले तिब्बतको भ्रमण गरेका थिए ।

चिनियाँ समाचार संस्था सिन्ह्वा का अनुसार तिब्बत स्वशासित क्षेत्र भएको ७० वर्ष पुगेको अवसरमा राष्ट्रपति सीसहितको टोली भ्रमणमा आएको हो ।

बुधबार बिहान उनी तिब्बतको स्विजरल्यान्ड भनेर चिनिने निङ्ची पुगेका थिए । चिनियाँ सञ्चारमाध्यम र सामाजिक सञ्जालमा पोस्ट गरिएका भिडियोमा निङ्चीका स्थानीय बासिन्दाले राष्ट्रपति सीले ‘टासी डेले’ भन्दै स्वागत गरेको देखिन्छ ।

राष्ट्रपति सीले स्थानीय बासिन्दासँगको भेटमा तिब्बती समुदाय एउटा सुखी भविष्यप्रति अघि बढिरहेको बताएका थिए ।

एक दशकअघि उपराष्ट्रपतिका रुपमा भ्रमण गर्दा सीले तिब्बतमा ‘पृथकतावादी समूह’ सँग लड्ने बताएका थिए । उनले निर्वासनमा रहेका तिब्बती धर्मगुरु दलाई लामाको समूहप्रति संकेत गर्दै एक चीन नीतिमा आफूहरु अडिग रहेको बताएका थिए ।

राष्ट्रपति सीले न्याङ नदीमा बनेको पुलको पनि अवलोकन गरेको सिन्ह्वाले जनाएको छ । त्यस्तै यार्लुङ जाङ्बो नदीको बेसिनको पनि उनले निरीक्षण गरेका थिए । त्यस्तै बिहीबार उनी निङ्ची रेल स्टेसन पुगेका थिए ।

उनले त्यहाँ सिचुवान–तिब्बत रेल्वे सञ्चालनका बारेमा जानकारी लिएको र त्यहाँबाट रेलमै ल्हासा गएको पनि सिन्ह्वाले जनाएको छ ।

गत महिना मात्रै चीनले ल्हासा–निङ्ची रेल सञ्चालन गरेको थियो । उक्त रेल तिब्बतमा सञ्चालन भएको पहिलो विद्युतीय रेल हो ।


प्रकाशित : २०७८ श्रावण ८, शुक्रबार १६:४१ गते

धेरै पढिएको

ताजा समाचार