डेरा गरेर बसेका विद्यार्थीलाई गृह जिल्ला पुर्याइने

0
193

झापा – जिल्लाका विभिन्न स्थानमा डेरा गरेर अध्ययनरत विद्यार्थीलाई उनीहरुको गृह जिल्ला पुर्याइने भएको छ । कोभिड–१९ को सङ्क्रमण नियन्त्रणका लागि सरकारले देशभर लकडाउन घोषणा गरेपछि डेरामा बसेर अध्ययनरत विद्यार्थी समस्यामा परेकाले उनीहरुलाई गृह जिल्ला पुर्याउने व्यवस्था गरिएको कोरोना भाइरस रोकथाम, उपचार तथा समन्वय अनगुमन समिति झापाका संयोजक सोमनाथ पोर्तेलले जानकारी दिए ।

उनका अनुसार झापामा करीब ३५० विद्यार्थी बाहिर अन्य जिल्लाबाट आएर अध्ययन गरिरहेका छन् । “लकडाउनका कारण विद्यार्थी समस्यामा रहेकाले उनीहरुलाई आआफ्नो घरमा पुर्याउने समितिको निर्णय भएको छ”, उनले भने, “चाँडै उनीहरुलाई घर पुर्याइने व्यवस्था गर्दै छौँ ।”

त्यस्तै, झापामा राहत वितरणमा एकरुपता ल्याउन मापदण्ड बनाउने तयारी थालिएको छ । राहत वितरणमा गाउँपालिका र नगरपालिकाले टोल विकास संस्थालाई परिचालन गर्ने, राहत पाउने परिवार छनोटका लागि वडास्तरीय सर्वदलीय सर्वपक्षीय संयन्त्र गठन गरेर वास्तविक विपन्न परिवारको पहिचान गरी राहत वितरण गर्ने व्यवस्था गर्न प्रदेश सरकारसँगको सहकार्यमा मापदण्ड बनाउने तयारी थालिएको संयोजक पोर्तेल बताउँछन् ।

झापाका १५ वटा स्थानीय तहले स्थापना गरेको राहत कोषमा हालसम्म रू पाँच करोड २२ लाखभन्दा बढी रकम जम्मा भइसकेको संयोजक पोर्तेलले जानकारी दिए । उनका अनुसार स्थानीय तहले ३३ हजार विपन्न परिवारलाई सात लाख केजी चामल वितरण गरिसकेको छ । साथै, दाल, नून, खानेतेल, साबुनलगायत सामग्री समेत वितरण गरिएको छ । झापामा ७०० बेडको क्वारेन्टाइन निर्माण गरिएको छ भने नौ जनाको कोरोना स्वाब परीक्षण गरिएको छ । जसमध्ये आठ जनाको रिपोर्ट नेगेटिभ आएको छ भने एक जनाको रिपोर्ट आउन बाँकी छ ।

LEAVE A REPLY

Please enter your comment!
Please enter your name here